الماء الذى ضيعنا

 

 بدّك تعرف شو قصة الدانا والمي ؟؟
يحكى أن مسؤولاً من الدرجة الرفيعة قرّر زيارة قرية الدانا ، ولذلك اجتمع أهل الدانا عند المختار كي يتفقوا على استقبال يليق بمكانة المسؤول .

بعد نقاش طويل ... قرر أهالي القرية أن يجهزوا وليمة ضخمة لذلك المسؤول ، واتفقوا أن يحضر كل شخص من بيته جزءاً من الوليمة .

المهم ... قبل العزيمة بيوم ، أحد الأشخاص فكر في نفسه وقال : (( أنا رح جيب المي وأكيد جاري رح يجيب الأكل ))

وبنفس الوقت .. كان جاره يفكر في نفسه ويقول (( أنا رح جيب المي وأكيد جاري رح يجيب الأكل ))

وكان جارهم الثالث يفكر في نفسه ويقول (( انا رح جيب المي وأكيد جاري رح يجيب الأكل ))

وهكذا ....

وفي اليوم التالي تفاجأ المسؤول عند وصوله بان الوليمة كلها كانت ماء فقط !!

المسؤول شرب من أول شخص ... فجاءه شخص آخر وحلف عليه كي يشرب من عنده ، ثم جاء شخص ثالث وحلف على المسؤول أن يشرب من عنده أيضاً .... وهكذا ...

وكاد يومها أن يموت المسؤول من كثرة الماء الذي شربه
وكانت تلك الزيارة أول وآخر زيارة له لقرية الدانا الميمونة !!


في رواية أخرى عن الدانا ومغامراتها مع الماء ...

أيضاً أراد أحد المسؤولين أن يزور الدانا .. وقرر أهالي الدانا أن يجهزوا له وعاء ضخماً من الحليب كي يفاجئوه به ، ولذلك اتفقوا أن يحضر كل شخص من بيته يوم الاستقبال كأساً صغيراً من الحليب كي يفرغوا جميع الكؤوس في الوعاء الضخم .

قبل وصول المسؤول بيوم .. فكر أحد الأشخاص وقال في نفسه (( أنا لو جبت كاسة مي بدل الحليب ... ما حدا رح يحسّ !!))

ولكن فكر شخص آخر وقال في نفسه ((أنا لو جبت كاسة مي بدل الحليب ... ما حدا رح يحسّ !!))

وهكذا ...

المهم ..... في يوم الاستقبال ... تفاجأ المسؤول بأن الوعاء الضخم كله مملوء بالماء فقط !!!!!


من ورا هالقصص (( الله أعلم اذا كانت صحيحة )) ، صاروا يتهموا الدانا وأهلها بالبخل ...

الرد على التشدقات المزعومة :

قال تعالى (( وجعلنا من الماء كل شيء حياً ))

وهذا يعني انو الماء هو أساس الحياة ، وهو اغلى شيء في الوجود

تصوروا عدم وجود الماء في الأرض .. لا نبات ولا حيوان .. وبالتالي لا انسان ولا بشرية

يمكن تقولوا أنو الأكل أهم من الماء .... هادا غلط

أنا بحسن استغني عن الأكل أكتر من اسبوع
بس ما بحسن استغني عن المي أكتر من 3 أيام

الأكل مصدرو هو النبات + الحيوان

لولا الماء لما وجد النبات والحيوان ... وبالتالي ما رح ينوجد الأكل

هادا التفسير العلمي

وهلق رح قول التفسير اللي أنا شفتو بعيني :

أنا من فترة قريبة رحت بالسيارة على النبع اللي كانوا نساء ضيعتنا يجيبوا المي منو

بما أنو القصة صارت من زمااان .. معناتا ما كان في سيارات ليجيبو المي فيها من النبع عالضيعة

والوالد حكالي أنو كانوا النساء يمشوا أكتر من 10 كيلو متر مشان يوصلوا من الضيعة للنبع ... ويرجعوا المسافة نفسها مشياً وهن حاملين أوعية المي على رؤوسهم

تصوروا أنو كانت المي عندهم بالبيت مقسومة 3 أقسام :

قسم للشرب والطبخ + قسم للحمام + قسم للغسيل ... والمي اللي بيغسلوا فيها كانوا يشطفوا الأرض فيها بعد ما يستخدموها بالغسيل !!!

وبالتالي : اذا كانت هالقصة صحيحة .. فهادا بيدل أنو اهل الدانا قمة في الكرم .... ليش ؟؟

لأنو اذا حدا بتحبو وبدك تكرمو ، بتقدملو أغلى شي عندك

وأغلى شي في الحياة هو الماء .... صحيح ؟؟

ولذلك ... كل ما جابوا سيرة المي والدانا ... أنا ما بزعل

بالعكس ... أنا بفتخر !!

بانتظار حكمكم على هالقصة وعلى تفسيري ... وبانتظار تفسيراتكم اذا عندكم ...